நெகிழி அழிந்து போவதில்லை!

நெகிழி மக்குவதற்குப் பல நூற்றாண்டுகளுக்கு மேல் பிடிக்கும். நெகிழி தூய்மைக்கேடு பரவலான மற்றும் நிலையான சேதத்தைச் சூழல் மண்டலத்தில் ஏற்படுத்தியிருக்கிறது. நெகிழி மாசுபாட்டினைப் பற்றித் புரிந்துகொள்ள முதலில் நெகிழி என்றால் என்ன என்று தெரிந்து கொள்ள வேண்டும். நெகிழி என்பது கரிமம் (புதை படிமங்கள்) மற்றும் இரசாயனக் கலவையால் செய்யப்பட்ட பொருளாகும். நெகிழி என்பது பாதுகாப்பற்ற பல ஆயிரக்கணக்கான இரசாயனங்களின் கூட்டு ஆகும். இவற்றின் பெரும்பாலான இரசாயனங்கள் நச்சுத்தன்மை வாய்ந்தவை. நெகிழியில் இருக்கும் 10,000-க்கும் மேற்பட்ட இரசாயனங்கள் என்னென்ன என்று கண்டுபிடிக்கப்பட்டுள்ளது. இதில் 2,400 இரசாயனங்கள் மிக அபாயகரமானவை என்று இனங்காணப் பட்டுள்ளன (நூற்றுக்கும் மேற்பட்ட நெகிழி இரசாயனங்களின் ஆபத்து பற்றிய தகவல்கள் இல்லை).

நெகிழி மக்கிப்போவதற்கு ஆண்டுக்கணக்கில் ஆகும் என்பதற்கான 4 காரணங்கள்!

1. நெகிழி நெகிழ்திறன் கொண்டது: நெகிழியின் நெகிழ்திறனுக்கு அதன் மூலக்கூறுகள் காரணமாகும். நெகிழி என்பது பெட்ரோஇரசாயனங்களிலிருந்து தருவிக்கப்பட்ட செயற்கை மீச்சேர்மங்களின் நீண்ட சங்கிலிகளால் ஆனது. இந்த மீச்சேர்மங்கள் சடப்பொருள், இரசாயன மற்றும் உயிரியல் சிதைவைத் தாங்கும் வகையில் வடிவமைக்கப்பட்டுள்ளன. ஒரு பொருள் அதிக காலம் உழைப்பதற்கும் நிலைத்திருப்பதற்கும் இது உதவுகிறது. நெகிழியின் இவ்வாறான தன்மை சிறப்பான தயாரிப்புகளுக்கு இட்டுச் சென்றாலும், கழிவு மேலாண்மை மற்றும் சுற்றுச்சூழல் பாதுகாப்பிற்குப் பெரிய சவாலாக உருவெடுத்திருக்கிறது.

2. நுண் நெகிழிச் சிதறல்கள்: நெகிழிகள் விரைவில் சிதையாவிட்டாலும் கூட அவை சூரிய ஒளி பாதிப்பு மற்றும் வெளி உராய்வுகள் போன்ற இயற்பியல் சிதைவுகளுக்கு ஆளாகின்றன. நெகிழிகளில் தொடர்ச்சியாகச் சூரிய ஒளி படும்பொழுது மீச்சேர்மங்களின் இணைப்புகள் நாளடைவில் உடைபட்டு நுண்ணெகிழிகளாக மாறுகின்றன. காற்று, நீர் மற்றும் இதர வகையான உராய்வுகளும் நெகிழித் துகள்களை உருவாக்குகின்றன. ஆனால், இவை யாவும் அந்த நெகிழிகளை அழிப்பதில்லை; நெகிழிகள் நுண்துகள்களாக்கப்பட்டு சூழலில் தொடர்ந்து இருந்து வருகின்றன.

3. சுற்றுச்சூழலும் நெகிழி சிதையும் அளவும்: நெகிழி எந்த அளவுக்கு சிதைகிறது என்பது சுற்றுச்சூழலைப் பொருத்து மாறுபடும். பலதரப்பட்ட நெகிழிகள் குப்பைமேடுகளில் கொட்டப்படுகின்றன. அங்கு போதிய சூரிய ஒளி, பிராணவாயு மற்றும் நுண்ணுயிரிகளின் இயக்கம் இல்லாத பட்சத்தில் நெகிழி சிதைந்து போவது தாமதமாகிறது.  ஆனால், நீர்நிலைகளில் இருக்கும் நெகிழிகள் புற ஊதாக்கதிர் தாக்குதல்களுக்கு உள்ளாகும்பொழுது அங்குள்ள வேறு உயிரினங்கள் மற்றும் பொருள்களின் உராய்வுகளினால் நெகிழிகள் விரைவில் சிதைகின்றன. நெகிழிகள் முழுமையாகச் சிதைந்துபோக பல நூற்றாண்டுகள் ஆகலாம்.  புற ஊதாக்கதிரை சமன்படுத்தும் சில கூட்டுப்பொருள்கள் நெகிழிகளைச் சூரிய ஒளி தாக்கத்திலிருந்து தடுத்து அவை சிதைந்து போவதையும் குறைக்கின்றன.

4. இயற்கையாகச் சிதைந்து போவதற்கான வழிகள் இல்லை: சூழலின் இயற்கைப் பொருள்களை மண்ணில் உள்ள நுண்ணுயிரிகள் உடைத்தெடுக்கின்றன. இவை பிறகு சுற்றுச்சூழலில் ஈர்த்துக்கொள்ளப்படுகின்றன.  ஆனால், நெகிழிகள் சூழலில் இயல்பாகச் சிதைந்து போவதற்கு வழி இல்லை. இயற்கைப் பொருள்களை மக்கச் செய்யும் நுண்ணுயிர்க்கிருமிகளும், பூஞ்சைகளும் நெகிழியை அவ்வாறு  மக்கச் செய்ய இயலாது. அதனால், நெகிழி பல நூற்றாண்டுகளுக்கும் மேலாக சூழலில் நிலைத்து நிற்கிறது.  பின் இந்த நெகிழிகள் சிறு துகள்களாக உடைந்து நுண்ணெகிழிகளாக உருமாறுகின்றன.

நெகிழி சிதைவதற்குப் பல நூற்றாண்டுகள் ஆவதோடு அது சிக்கலானதும் கூட. அது விட்டுச் செல்லும் சுற்றுச்சூழல் கேடுகள் அதிகமானவை. நெகிழியின் நெகிழ்திறன் காரணமாக அது பயன்படுத்துவதற்கு உறுதியாக இருந்து சிதைந்து போகாமல் அதிக காலம் இருக்கிறது. அப்படி இருக்கும் காலக்கட்டத்தில் அது சொல்லொணா சுற்றுச்சூழல் கேடுகளை விட்டுச் செல்கிறது. நெகிழி எதனால் சூழலில் நிலைத்திருக்கிறது என்பதனைத் புரிந்துகொண்ட பிறகு, நெகிழி உபயோகத்தைக் குறைத்துக்கொள்ளுதல், கழிவு நிர்வாகத்தை சீரமைத்தல் மற்றும் நிலைபேறான மாற்று வழிகளை யோசித்தல் ஆகியவற்றின் மூலம் நெகிழிப் பிரச்சனையை நாம் இன்னும் திறன்பட கையாள முடியும்.

நெகிழியினால் ஏற்படும் பாதிப்புகளைக் குறைத்தல் மற்றும் நிலைபேறான செயல்முறைகளைக் கடைபிடித்தல் ஆகியவையே நம் புவியின் எதிர்காலத்தை நிர்ணயிப்பவை. நெகிழி தூய்மைக்கேடு, நெகிழி சுழற்சியின்பொழுது வெளியாகும் நச்சு இரசாயனங்கள் ஆரோக்கியத்திற்கும் சுற்றுச்சூழலுக்கும் உருவாக்கும் அச்சுறுத்தல்கள் ஆகியவற்றை இனங்கண்டு நடவடிக்கை எடுக்கும் நோக்கில் அனைத்துலக ரீதியிலான நெகிழி ஒப்பந்தத்தை உருவாக்குவதற்கான முயற்சிகள் நடைபெற்றுக் கொண்டிருக்கின்றன.

References:

An Introduction to Plastics and Toxic Chemicals | IPEN. (2022, November). IPEN (International Pollutants Elimination Network). https://ipen.org/documents/introduction-plastics-and-toxic-chemicals

Frequently asked questions on plastics and chemicals | IPEN. (2024, March). IPEN (International Pollutants Elimination Network). https://ipen.org/documents/frequently-asked-questions-plastics-and-chemicals

Plastics, EDCs & Health | IPEN. (2020, December). IPEN (International Pollutants Elimination Network). https://ipen.org/documents/plastics-edcs-health

How the Plastic Pollution Resolution Relates to Chemicals and Health | IPEN. (n.d.). IPEN (International Pollutants Elimination Network). https://ipen.org/documents/how-plastic-pollution-resolution-relates-to-chemicals-and-health

Ghost Nets: Why they endanger Marine life – Plastic Soup Foundation. (2020, May 1). Plastic Soup Foundation.
https://www.plasticsoupfoundation.org/en/plastic-problem/plastic-environment/ghost-nets/

Tribune, Z. E. C. D. (2019, January 7). Why is it so hard to decompose plastic? Columbia Daily Tribune.
https://www.columbiatribune.com/story/lifestyle/family/2019/01/07/why-is-it-so-hard/98492007/

Centre for International Environmental Law. (2022, February 1). Plastic and Climate: The Hidden Costs of a Plastic Planet – Center for International Environmental Law. https://www.ciel.org/plasticandclimate/

Lai, O. (2024, March 4). The detrimental impacts of plastic pollution on animals. Earth.Org.
https://earth.org/plastic-pollution-animals/

Swaters. (2023, April 14). New Study Shows Plastics Release Greenhouse Gases, Contributing to Climate Change. Surfrider Foundation. https://www.surfrider.org/news/new-study-shows-plastic-as-source-of-greenhouse-gases-potentially-contribut