நெகிழி இல்லாத தீபாவளியைக் கொண்டாடுவோம்! பினாங்கு ஆட்சிக் குழு உறுப்பினர், பினாங்கு நகராண்மைக் கழக மேயர், பினாங்கு பயனீட்டாளர் சங்கம் மற்றும் பினாங்கு இந்து சங்கம் கூட்டாக வேண்டுகோள்!

பத்திரிகைச் செய்தி    17.10.2025

தீபாவளியைக் கொண்டாடும் இந்துக்கள், இந்த ஆண்டு தீபாவளியை நெகிழி இல்லாத பண்டிகையாக கொண்டாடும்படி கேட்டுக்கொள்ளப்பட்டுள்ளனர். நெகிழி என்பது உலகிற்கு ஒரு பேரழிவாகும். நெகிழி மாசுபாடு நமது சுற்றுச்சூழலுக்கும் பொது சுகாதாரத்திற்கும் மிகவும் பரவலான மற்றும் நயவஞ்சகமான அச்சுறுத்தல்களை ஏற்படுத்துவதாக இந்த நெகிழி இல்லா தீபாவளி பிரச்சாரத்தின் ஒருங்கிணைப்பாளரும் பினாங்கு பயனீட்டாளர் சங்கத்தின் கல்வி அதிகாரியுமான என்.வி.சுப்பாராவ் தெரிவித்தார்.

இந்த நெகிழி இல்லா தீபாவளி பிரச்சாரத்திற்கு ஆதரவு நல்கிய பினாங்கு மாநில வீடமைப்பு மற்றும் சுற்றுச்சூழல் ஆட்சிக்குழு உறுப்பினர் டத்தோ சுந்தராஜு, பினாங்கு தீவின் நகராண்மைக் கழக மேயர் டத்தோ பி.ராஜேந்திரன் மற்றும் பினாங்கு மாநில இந்து சங்க பேரவையின் தலைவர் விவேக ரத்னா ஆ.தர்மன் ஆகியோருக்கு பினாங்கு பயனீட்டாளர் சங்கம் தனது நன்றியை தெர்வித்துக்கொள்வதாக சுப்பாராவ் கூறினார்.

தீபாவளி தீமையை, நன்மையும் இருளை விட ஒளியும் பெற்ற வெற்றியைக் கொண்டாடுகிறது. இன்றைய காலகட்டத்தில், மாசுபாடு இல்லாமல் மற்றும் செயற்கை பொருட்கள் மற்றும் நெகிழிகளைப் பயன்படுத்தாமல் சுற்றுச்சூழலுக்கு உகந்த தீபாவளியைத் தழுவுவதே சவால் என அந்த நால்வரும் இன்று நடைபெற்ற செய்தியாளர் சந்திப்பில் தெரிவித்தனர்.

நவீன வாழ்க்கை முறைகள் பெரும்பாலும் தண்ணீர் மற்றும் குளிர்பான நெகிழி பாட்டில்கள், நெகிழி தட்டுகள், கோப்பைகள், கரண்டிகள் மற்றும் உணவு பேக்கேஜிங் போன்ற ஒற்றைப் பயன்பாட்டுப் பொருட்களின் பயன்பாட்டிலிருந்து அதிக அளவு கழிவுகளை உருவாக்குகின்றன.

தீபாவளி நெகிழிகளால் அல்ல, அன்பால் நிரப்பப்பட வேண்டும். பொறுப்பான மற்றும் சுற்றுச்சூழல் நட்பு முறையில் தீபாவளியைக் கொண்டாடுவது சுற்றுச்சூழலைப் பாதுகாப்பது மட்டுமல்லாமல், பாரம்பரியத்தை மதிக்கிறது மற்றும் எதிர்கால சந்ததியினருக்கு ஒரு முன்மாதிரியாகவும் அமைகிறது.

அடுத்த தலைமுறையினர் ஆரோக்கியமாக வாழ வேண்டும் என்றால், இன்றைய சமூகத்தினர் நெகிழி பயன்பாட்டை நிறுத்த வேண்டும் அல்லது அதற்கு ஒரு முற்றுப் புள்ளியை வைக்க வேண்டும் என்றனர் அவர்கள்.

சில இனிப்பு பலகார விற்பனையாளர்கள் இனிப்புகளை வாங்கும் பயனீட்டாளர்கள் தாங்கள் வாங்கும் ஒவ்வொரு பொருளுக்கும் ஒருமுறை பயன்படுத்தக்கூடிய நெகிழியை கோருவதாக புகார் தெரிவித்தனர்.

நெகிழி என்பது சுற்றுச்சூழல், வனவிலங்குகள் மற்றும் மனித ஆரோக்கியத்திற்கு பல வழிகளில் தீங்கு விளைவிக்கின்றது. நெகிழி பாத்திரங்கள், அலங்காரங்கள் மற்றும் பரிசு பேக்கேஜிங் ஆகியவற்றை வேண்டாம் என்று கூறி நெகிழி இல்லாத பண்டிகையைக் கொண்டாடும்படி அவர்கள் வேண்டுகோள் விடுத்தனர்.

நெகிழி பைகளுக்கு பதிலாக சணல் மற்றும் துணி போன்ற பைகளை, பொருட்களைப் பயன்படுத்த வேண்டும். ஷாப்பிங் செய்யும்போது உங்கள் சொந்த பைகளைக் கொண்டு வர வேண்டும்.

உங்கள் வீட்டை நெகிழி அலங்காரத்தால் அலங்கரிக்க வேண்டாம் அல்லது நெகிழி மா இலைகளை வாங்க வேண்டாம் என இவர்கள் நினைவுபடுத்துகின்றனர். அதற்கு பதிலாக இயற்கை பச்சை இலைகளைப் பயன்படுத்த வேண்டும்.

நெகிழி கொள்கலன்களில் உணவை பரிமாற வேண்டாம் அல்லது நெகிழி கரண்டி மற்றும் கோப்பைகளைப் பயன்படுத்த வேண்டாம். கிடைத்தால், வாழை இலைகளில் உணவை பரிமாறவும் அல்லது மீண்டும் பயன்படுத்தக்கூடிய பாத்திரங்களுக்கு மாறவும்.

இந்த தீபாவளியை புதுமையாக ஆனால் நெகிழி இல்லாத பாரம்பரியத்தை புதுப்பிக்கவும், நிலையான நடைமுறைகளை ஏற்றுக்கொள்ளவும், நெகிழி இல்லாத உலகத்தை நோக்கி நகர நாம் உறுதி எடுத்துக்கொள்ள வேண்டும்.

நெகிழி இல்லாமல் தீபாவளியை மிகச் சிறப்பான ஆரோக்கிய முறையில் கொண்டாடுங்கள் என நான்கு அமைப்புக்களும் கூட்டாக வேண்டுகோள் விடுத்திருப்பதாக சுப்பாராவ் தெரிவித்தார். இந்த நெகிழி இல்லா தீபாவளி துவக்க நிகழ்ச்சியின் போது அந்த லிட்டல் இந்தியா பகுதியில் தீபாவளிக்கு பொருட்களை வாங்க வந்த பயனீட்டாளர்கள் ஒவ்வொருவருக்கும் துணிப் பைகள் இலவசமாக தரப்பட்டது.

இதற்கிடையே தீபாவளி காலக்கட்டத்தில் சமைக்கப்படும் உணவுகளை மிச்சப்படுத்தி இறுதியில் தூக்கி எறியும் பழக்கத்தை பின்பற்ற வேண்டாம் என சுப்பாராவ் நினைவு படுத்தினார். ஒவ்வொரு பெருநாள் காலக்கட்டத்தில் மலேசியர்கள் அதிக அளவு சமைத்த உணவு களை குப்பைத்தொட்டிக்கு அனுப்பி வருகின்றனர்.

இது நிறுத்தப்பட வேண்டும். மிக அண்மைய புள்ளி விவரப்படி மலேசியர்கள் ஒவ்வொரு ஆண்டும் தலா ஒருவர் 81 கிலோ எடையுடைய நல்ல நிலையில் உள்ள உணவை தூக்கி எறிவதாக அறிவிக்கப்பட்டுள்ளது. இதில் 24% நாம் உண்ணக்கூடிய உணவாகும். ஆகவே தீபாவளிக்கு அதிக அளவில் சமைக்காமல் தேவையான அளவிற்கு சமைக்கும்படி சுப்பாராவ் வேண்டுகோள் விடுத்தார். மேலும் தீபாவளிக்கு மாமிச உணவுகளை தவிர்க்கும்படி அவர் ஆலோசனை கூறினார்.

என்.வி.சுப்பாராவ்
கல்வி அதிகாரி
பினாங்கு பயனீட்டாளர் சங்கம்