மாசுபாட்டால் ஆயிரக்கணக்கான மீன்கள் இறப்பு. பகாங் பேரா நதி மாசுபாடு பிரச்சனை உடனடியாகத் தீர்க்கப்பட வேண்டும். பினாங்கு பயனீட்டாளர் சங்கம் வேண்டுகோள்!

பத்திரிகைச் செய்தி: 05.10.2025

பகாங் மாநிலத்தின் சுங்கை பேரா ஆற்றில் ஏற்பட்டுள்ள மாசுபாடு பிரச்சனையைத் தீர்க்க, சம்பந்தப்பட்ட அதிகாரிகள் உடனடியாக நடவடிக்கை எடுக்க வேண்டும் என பினாங்கு பயனீட்டாளர் சங்கம் அவசர வேண்டுகோள் விடுத்துள்ளது.

இந்தப் பிரச்சனை, அந்தப் பகுதியில் உள்ள சில தொழிற்சாலைகளிலிருந்து ரசாயனக் கழிவுகள் கொட்டப்படுவதாலும், சில பொறுப்பற்ற மக்களின் செயல்களாலும் ஏற்பட்டிருக்கலாம் என்று அச்சங்கத்தின் தலைவர் முகைதீன் அப்துல் காதர் தெரிவித்தார்.

மாசுபாட்டின் காரணமாக ஆயிரக்கணக்கான மீன்கள் ஆற்றில் இறந்துள்ளன. கம்போங் லுபுக் டெம்பங்கன் அருகிலுள்ள சுங்கை கெர்டிங்கில் தொடங்கி, சுங்கை பேராவிற்கு வரை மாசுபாடு பரவி இருப்பது கண்டறியப்பட்டுள்ளது.

இந்த நிலைமை தொடர்ந்தால், உள்ளூர்வாசிகளிடையே விஷம் கலந்த நீர் குடிப்பதற்கான அபாயம் இருப்பதால் கவலைகள் எழுந்துள்ளன என்றும் முகைதீன் தெரிவித்தார்.

மாசுபாடு நீண்ட காலமாக நடைபெற்று வருகிறது. சம்பந்தப்பட்ட தரப்பினரிடம் பலமுறை புகார்கள் அளிக்கப்பட்டிருந்தாலும், இதுவரை எந்தத் தீர்வும் கிடைக்கவில்லை என்பது வருத்தத்திற்குரியது என அவர் குறிப்பிட்டார்.

இந்தப் பிரச்சனை சுற்றுச்சூழலுக்கு அச்சுறுத்தலாக மட்டுமல்லாமல், குடியிருப்போரின் வாழ்வாதாரத்தையும் பாதிக்கிறது. எதிர்காலத்தில் பொதுச் சுகாதாரத்திற்கும் தீங்கு விளைவிக்கும் என்பதால், அதிகாரிகள் இதனை மிகுந்த கவனத்துடன் எடுத்துக்கொள்ள வேண்டும் என பினாங்கு பயனீட்டாளர் சங்கம் வலியுறுத்துகிறது. இந்தச் சம்பவம் மீண்டும் நிகழாதவாறு தடுக்க, சுற்றுச்சூழல் தரச் சட்டம் 1974 கண்டிப்பாக அமல்படுத்தப்பட வேண்டும்.

மேலும், பாதிக்கப்பட்ட பகுதிகளில் மீன்பிடி நடவடிக்கையில் ஈடுபடும் மக்களின் சுகாதாரப் பாதுகாப்பை உறுதி செய்வதற்காக, அருகிலுள்ள ஆலைகளின் நீர் தரத்தையும், மீன்வளத் துறை மற்றும் சுகாதாரத் துறை இணைந்து, மீன் சடலங்களில் நச்சுத்தன்மை சோதனைகளையும் நடத்த வேண்டும் என பினாங்கு பயனீட்டாளர் சங்கம் நம்புகிறது என்று முகைதீன் அப்துல் காதர் தெரிவித்தார்.

முகைதீன் அப்துல் காதர்
தலைவர்,
பினாங்கு பயனீட்டாளர் சங்கம்