பள்ளி மாணவர்கள் தண்ணீர் பாட்டில் கொண்டு வருவதைக் கல்வி அமைச்சு கட்டாயமாக்க வேண்டும் எனப் பினாங்கு பயனீட்டாளர் சங்கம் வலியுறுத்தியுள்ளது.

மலேசியாவில் தற்போது நிலவி வரும் கடும் வெப்ப அலை வரும் ஜூன் மாதம் வரை நீடிக்கும் என்று எதிர்பார்க்கப்படுவதால், மாணவர்களின் நலனைக் கருத்தில் கொண்டு இந்த நடவடிக்கை எடுக்கப்பட வேண்டும் எனச் சங்கத்தின் கல்வி அதிகாரி என்.வி. சுப்பாராவ் தெரிவித்துள்ளார். பல மாணவர்கள் தாகத்தைத் தணிக்க இனிப்பு கலந்த பானங்களை நாடுகின்றனர்; ஆனால் வெறும் நீரே வெப்ப பாதிப்புகளுக்குச் சிறந்த மருந்தாகும் என்பதால், நெகிழி அல்லாத தண்ணீர் பாட்டில்களை மாணவர்கள் பள்ளிக்குக் கொண்டு வருவதை உறுதி செய்ய வேண்டும்.

வகுப்பறையில் மாணவர்கள் போதிய அளவு தண்ணீர் குடிப்பதை ஆசிரியர்கள் கண்காணிக்க வேண்டும் என்றும், பள்ளி முடிந்து வீட்டிற்குச் செல்லும் முன் அவர்கள் கொண்டு வந்த தண்ணீரை முழுமையாகக் குடித்து முடிப்பதை உறுதிப்படுத்த வேண்டும் என்றும் அவர் கேட்டுக் கொண்டார். மேலும், குறைந்த வருமானம் கொண்ட குடும்பங்களைச் சேர்ந்த மாணவர்களுக்குத் தண்ணீர் பாட்டில்கள் வாங்க வசதி இல்லையெனில், அரசாங்கம் ‘ரஹ்மா’ திட்டத்தின் கீழ் அவற்றை இலவசமாக வழங்க வேண்டும். வெறும் மின்விசிறியின் கீழ் மாணவர்களை அமர வைப்பது மட்டும் போதாது, இத்தகைய வெப்பமான சூழலை எவ்வாறு கையாள்வது என்பது குறித்து அவர்களுக்கு முறையான விழிப்புணர்வை வழங்க வேண்டும் என அவர் வலியுறுத்தியுள்ளார்.